
السفير 24
واش كتفهم شي حد كيخرج من السجن بعفو ملكي، يعني دارو معاه الخير، وبدل ما يقول “الله يعز بلادي”، يشد طريق الهروب ويمشي لتونس باش يسب البلاد اللي كبر فيها وعاش فيها وداواتو من المرض ودافعات عليه الحقوقيين وحتى الإعلام؟
سليمان الريسوني، الصحفي اللي كان معروف، ولى اليوم معروف بالخيانة. خرج من الحبس فـ2023 بعفو ملكي إنساني، بعد ما دار إضراب على الماكلة وولات حالتو الصحية كتحزّ فالقلب، الدولة دارت معاه الزين وقدرات الوضعية ديالو، ولكن هو أول ما خرج نسى كلشي، وشد طيارة وخرج برا، وبدا كيسب فبلادو فبعض المنابر اللي ما عندها لا ضمير لا مبدأ.
والأكثر من هاد الشي، كيقولو مصادر إعلامية باللي هاد السيد راه باغي يطلب اللجوء السياسي فكندا، وهادي خطة باينة: يخرج من المغرب، يدير راسو مظلوم، ويبدأ يشوه فالصورة ديال البلاد، باش يجبد الشفقة ويقنع الكنديين يعطيوه اللجوء. ولكن المغاربة عارفين الحقيقة، وعارفين الفيلم اللي داير فيه.
الفضيحة الكبيرة ماشي فخروجو، ولكن فالتصرفات ديالو اللي ما فيها لا شكر لا اعتراف بالجميل. باقيين المغاربة ما فاهمينش: كيفاش واحد تقول عليه ناشط حقوقي، وما عندوش حتى شوية من الأخلاق باش يحترم بلادو والناس اللي تعاطفو معاه؟
وزيد عليه، هاد السيد كان متابع فملف ماشي ساهل، تهم مرتبطة بالاعتداء، وكان القضاء دار خدمتو بكل استقلالية، ودافع على راسو بكل الوسائل، حتى كملات القضية فالإدانة. ماشي شي انتقام ولا شي تلفيق، ولكن حكم قانوني، كيف كيتطبق على أي مواطن.
واليوم، سليمان كيبان فبعض الحوارات كيهاجم كلشي، من القضاء للملك للشعب، وكأنو مظلوم مظلوم، بينما الحقيقة اللي كيشوفوها بزاف، هي أنه خسر المصداقية والاحترام، وباع الوطن مقابل لا شيء.
واخا نكونو مختلفين، الوطن ما كيتباعش، واللي عضّ اليد اللي طلقاتو من السجن، ما يستاهلش غير التوبيخ، بل يستاهل يعرف أن المغاربة ما بقاوش كيبلعو الهضرة الفارغة.



