
السفير 24
رجع لينا هشام جيراندو، هاد المرة ماشي من بلاطوهات بوليود، ولكن من خيال واسع سايب بلا فرانات. قالينا أن الدولة المغربية كتحاول “تغتال” الشعب عبر مشروع سماه “انطلاقة”! والاسم، حسب ما قال، ما جا صدفة، راه مستوحى من “طالقها تسرّح”، يعني سلسلة من الأكاذيب كيخيطها السيد براسو!
واللي مضحك فالقضية، هو أن سي جيراندو دار راسو الطبيب الشرعي الوحيد لي عرف كيفاش مات كلشي فهاذ البلاد، بل وشم ريحة السم لي ماتو بيه الناس، ولكن الغريب هو أنه بقى حي وما صرالو والو!
وحيت جيراندو بغا يبان سبع وما كايخافش، قال لينا بأنه فاش مشروع “انطلاقة” ما صدقش فيه، دارو ليه نسخة مطورة، سميتها “إسعاف”! وهاد المرة، كيتهم المخابرات العالمية (CIA والشاباك) وشي “عطار مجهول” كيدور بالحقيبة فيها “سم البصمات”، كيرشوه على الناس فتموت.
وما وقفش هنا، السيد وصل حتى قال لينا لقا الترياق لي كيبطل مفعول السم، وبدا كينصح الناس باش يستعملوه قبل ما يطيح عليهم الدور!
والمثير فالضحك، هو أنه مقتنع بزاف بهاد القصص، حتى بدا كيشوف “العطار المجهول” كيتنقل فالمطارات بحقيبتو، وكيتلقى مكالمات سرية من أصحاب مشروع “انطلاقة” فالمغرب!
وإلى قلت هاد الشي خيال علمي، فراه فعلاً كذلك، ولكن جيراندو مقتانع به 100%، وكيأكد أن المغاربة نصفهم مات، والتقارير الطبية كلها مزوّرة بأمر من العطار نفسه، لي كيدخل البلاد فحقيبة سحرية محمولة على أجنحة المؤثرات العقلية!



