السفير 24
توفيق بوعشرين، اللي داير راسو موضوعي وكيهضر باسم مصلحة البلاد، كيستغل القناة ديالو باش ينشر نظرة سوداوية وكئيبة على الوضع فالمغرب. كيبالغ بزاف فكلامو، وكيصوّر لينا البلاد بحال إلا غادي تتخرب، وكأن ما كاين لا إصلاحات لا تقدم، مع أن المغرب، بحال باقي الدول، كيواجه التحديات ولكن فنفس الوقت كيتقدم وكيحقق إنجازات مهمة فمجالات متعددة.
فموضوع التطبيع، بوعشرين دار راسو ما فاهمش السياق السياسي اللي خلا الدولة تاخد داك القرار، وعطا قراءة من زاوية وحدة، وكأن الدولة ما كتوزنش الأمور ولا كتحسب مصلحتها بحكمة.
وزاد كيبان التناقض ديالو ملي بدا كينتقد المشاريع اللي كيديرها المغرب باش يكون واجد لتنظيم كأس العالم، بحال إلا البنية التحتية ما خاصهاش التأهيل والتطوير. ناسي بأن هاد الإصلاحات ضرورية باش يقوى الاقتصاد ديال البلاد ويكبر النمو.
وفاش جا لزلزال الحوز، استغل معاناة الناس باش يروج لفكرة أن الدولة ما دارت والو، مع العلم أن التدخل كان سريع، والميزانيات كبيرة، والحملة ديال التضامن كانت تاريخية وقادها جلالة الملك شخصياً. ولكن بوعشرين اختزل كل هادشي فكلام سوداوي، اللي كيبين النية الحقيقية ديالو.
أما ملي كيجي يهضر على الاعتراف بالأخطاء، راه هو آخر واحد يقدر يهضر فهاد الموضوع، حيث حتى بعدما خرج بالعفو الملكي، ما بغا يعترف لا بالأخطاء لا بالجرائم، وباقي داير فيها ضحية.
المغرب راه ماشي بلاد مثالية، عندو تحديات، ولكن كيتقدم بخطى ثابتة. وحملات التبخيس والتشويه ما غاديش تضر باللي تبنا، والمغاربة عارفين الفرق بين النقد اللي كيبني، وكلام التهويل اللي غير كيزرع الإحباط.
